ეგვიპტეში კომენდანტის საათი გახანგრძლივდა

კაიროში კომენდანტის საათი გაახანგრძლივეს. მოსახლეობას ქუჩაში გამოსვლა
დღის 3 საათიდან დილის 8 საათამდე ეკრძალება. ახალი წესების მიუხედავად,
ეგვიპტის დედაქალაქის ცენტრში დემონსტრანტები კვლავ რჩებიან და აქციების
შეწყვეტას არ აპირებენ, ვიდრე პრეზიდენტი ჰოსნი მუბარაქი პოსტს არ
დატოვებს.

დღეს ისინი მორიგი ხალხმრავალი მსვლელობის მოწყობას აპირებენ. დღეს ეგვიპტეში სახალხო გაფიცვაც გამოცხადდა.

კაიროს ცენტრში წუხელ კვლავ სროლის ხმა ისმოდა. მოგვიანებით გაირკვა,
რომ უცნობებმა ცეცხლი შინაგან საქმეთა სამინისტროსთან გახსნეს. შენობიდან
სასწრაფოდ გაიყვანეს უწყების ყოფილი ხელმძღვანელი. გავრცელებული ცნობით,
სწორედ მისი ბრძანებით გაუხსნეს სამართალდამცველებმა ცეცხლი
დემონსტრანტებს.

დემონსტრანტებს ტაჰრირის მოედანზე პირველად შეუერთდა ვენიდან ჩასული
მუჰამედ ელ ბარადეი. ოპოზიციამ ნობელის მშვიდობის პრემიის ლაურეატ
დიპლომატს ახალი მთავრობის ფორმირება დაავალა.

ეგვიპტეში განვითარებულ მოვლენებს კიდევ ერთხელ გამოეხმაურა ჰილარი
კლინტონი. სახელმწიფო მდივანმა `ენბისისთან` ინტერვიუში განაცხადა, რომ
შეერთებულ შტატებს სურს ეგვიპტეში დემოკრატიული ცვლილებები იხილოს.

ავტორი Rustavi2

31.01.2011
ნახვა: 613

ყველა სიახლე