ანტისამთავრობო აქციებს ეგვიპტეში შეტაკებები მოჰყვა

კაიროს ქუჩები ისევ არეულობამ მოიცვა. პარასკევის ლოცვების
დასრულებისთანავე, ქალაქში ანტისამთავრობო აქციები განახლდა.
დემონსტრანტები პრეზიდენტ ჰოსნი მუბარაქის გადადგომას მოითხოვენ.

მიტინგის დაწყებისთანავე სამართალდამცველებმა აქციის დაშლა სცადეს,
რასაც შეტაკებები მოჰყვა. მომიტინგეებმა პოლიციელებს ქვები დაუშინეს. მათ
კი დემონსტრანტების წინააღმდეგ ცრემლსადენი გაზი გამოიყენეს.

კაიროს ქუჩებში გამოსულ ხალხს პრეზიდენტის მთავარი ოპონენტი, ნობელის
პრემიის ლაურეატი მუჰამედ ელ ბარადეიც შეუერთდა, რომელიც ვენიდან ეგვიპტეში
გუშინ ჩაფრინდა.

დემონსტრანტებსა და პოლიციელებს შორის შეტაკებები მიმდინარეობს ქალაქ
სუეცსა და ალექსანდრიაშიც, სადაც აქციის მონაწილეების წინააღმდეგ
პოლიციელებმა რეზინის ტყვიები გამოიყენეს.

აქტივისტები კოორდინაციის საშუალებად ”ტვიტერისა” და ”ფეისბუქის”
სოციალურ ქსელებს იყენებდნენ, ამიტომ მთელს ეგვიპტეში დაბლოკილია ინტერნეტი
და არ მუშაობს მობილური სატელეფონო ქსელი.